Hilfeeeeee!!
I ha Às Àrnschtshafts Problem! I sÀge öich, aus Huusmaa het mes de grad gar nid liecht....scho nume die Chocherei jede Tag!
Ăs Zytli he mer nume vo BĂŒchse glĂ€bt oder o ab und zue Ă€ PĂ€cklisuppe uf ta...
Aber denn hani mir gseit, dass das choche ja nid auzu schwÀr chönn sy und bi ga ychoufe, ha o no grad Às Chochbuech kouft. "
FĂŒr den modernen Hausmann" steit da druffe....eh ja, hami es bitzeli aagschproche gfĂŒeut...
schliesslech bini jo sit der Pangsionierig Huusmaa.
Deheime hanis du zersch mau chli ume blĂ€tteret. Aber i sĂ€ge öich, die ChochbĂŒecher si de so öppis vo kompliziert!
Da steit dinne: Man nehme.....
ja, vo wo de o um himuswĂŒue? Das steit niene...!
Auso guet, hani dÀnkt, de fahni haut eifach mau a und ha Nudle gmacht, die hani sowieso gÀrn. De hets gheisse, i söu d Nudle abschrecke.
Auso hani s Liecht usgschaute, ha mini wuuligi Chappe töif ĂŒbers Gsicht zoge und hami bide Nudle aagschliche und de ganz lut "huu-huu...! gmööget....
was hets brocht...? Gar nĂŒt! Meinsch die Nudle wĂ€re ab dĂ€m erschrocke..?
Und de hets gheisse, dass i söu d Sosse abbinge. Da hani zerscht mĂŒesse ga d Schnuer sueche, ha zum GlĂŒck no im Schuehschaft Ă€ Bitz gfunge....i ha stundelang probiert die Sosse abbzbinge...hesch das scho mau probiert? Da ĂŒberchunnsch ja Vögu!
De hani dĂ€nkt, ok, de ĂŒberspringeni das mau. De isch doch tatsĂ€chlĂ€ch gschribe gsy, i söu 50 gramm MĂ€u aaschwitze. Auso hani wider mini wulligi Chappe ufgsetzt, d Winterstifle aagleit und bi dĂŒr d Wohnig graaset, bis i fasch vom StĂ€ngeli gheit bi.
Aber was isch passiert? Luter Wasser hani gschwitzt! Luter Wasser! Aber kes gramm MĂ€u!
Auso guet, hani dĂ€nkt, das isch sicher Ă€ DruckfĂ€hler, de chocheni haut öppis angers! De hani Ă€s RezĂ€pt fĂŒrne Chueche gseh. Hmm.... das wĂ€r ja villĂ€ch o mau öppis, o weni nid wyt springe fĂŒr SĂŒesses....
De hani aafa lĂ€se, dert steit doch migotstĂŒĂŒri: i söu d Eier schlah! Nei! Das isch ja brutau, i chamer nid vorsteue, dass dĂ€ Chueche fröid het, we d Eier abgschlage wĂ€rde....und de steit no, dass i d Eier unger der Teig söu due. Ja klar....weisch wie die Souerei...? Wie söu me Eier ungerne flĂŒssige Teig due? Das louft ja aues devo...! und putze cha s de ig wider...!
Auso, hani o dĂ€ Chueche geischtig uf d Site ta und ha dĂ€nkt, de macheni haut Ă€s paar Chrömli. Aber itz chunnt der Glu, da sisi auso wĂŒrklĂ€ch z wyt gange! Da schribesi, dass i chlini HĂŒfeli ufs BlĂ€ch söu setze....i hamer ĂŒberleit, wĂ€r das de nĂ€chher söu Ă€sse....freiwillig....?
Aber schlau wieni bi hani mir de haut no mau Às angers RezÀpt use gsuecht.
I ha de der Teig gmacht, ganz ohni Problem und bi de fei Stouz gsy uf mi! De hani glÀse, dass i der Teig söu la zieh....ok, hani mir dÀnkt, wener wott ga, de söu Àr haut....i bi der Leiterwage ga hole und ha der Teig devor gleit. Aber meinsch, dÀ Cheib heig dÀ Charre wöue zieh? Kei Spuur!!
Auso, hani ne nachemne Zytli wider ine gno.
De hets gheisse, dass i d Springform uf die mittleri Schine söu steue....auso, weder mi fragit isch das Chochbuech nume öppis fĂŒr LĂŒt wo dirĂ€ckt am Bahnhof wohne.
Auso guet hani dĂ€nkt, ha die SchĂŒssle gno und bi mit em Göppu zum Bahnhof gfahre. I chanech sĂ€ge, bis i die mittleri Schine gfunge ha....und de hanise dert druf gsteut und ha afa warte. De chunnt doch tatsĂ€chlĂ€ch sone ICE....und schwupps, isch mini SchĂŒssle wĂ€g gsy!
I gloube, i lah die ganzi chocherei lieber la sy! I dene BĂŒecher steit ja eh nume Seich dinne! Die sötte das zersch sĂ€uber usprobiere und nid guetglöibigi Mönsche wie ig eine bi, i Wahnsinn trybe!!
Und ĂŒbrigens hani ja gar kei Zyt, i mues mini Nachbere frage, was es wider Nöis git, schliesslĂ€ch muesme ja aus aastĂ€ndige Huusfmaa immer ufem nöischte Stand sy, sĂŒsch heists de gli mau, was macht dĂ€ eigentlĂ€ch der ganz Tag, die isch ja nume no Huusmaa...!
Und de dĂ€nkesi villĂ€ch no, dass i vo nĂŒt Ă€ Ahnig ha...
Aber das stimmt natĂŒrlĂ€ch ĂŒberhoupt nid!